Halaga (Unan)

Sa unang pagyakap ko sa’yo

Kaligayahan ang aking napagtanto

Sa mga panahon na ika’y wala sa piling ko

Pakiwari ko’y kulang ako

Nang umuhip ang malamig na hangin

Pagsasamahan nating wagas, aking dalangin

Sa gabi kung saan tulog ko ay malalim

Marahil ang sanhi nito ay ang pagyakap ko sa’yo ng mataimtim

“Marami naman diyan at may iba’t-ibang klase.”

Ang bulalas palagi sa akin ng mga kaibigan kong babae

Bagamat mahirap nga tukuyin ang mga posibleng mangyari

Ikaw parin ang nais makatabi sa mga darating pang gabi

Ngunit ano nga ba, O aking sinta

Mga yakap mo noong kay init ngayon ay malamig na

At sa bawat takbo ng oras na lumilipas

Mga tampuhan at pagtatalo na lamang ang siyang tanging natirang bakas

Subukan nating ikumpisal at isigaw

Mga bagay na tila sa ating kasiyahan ay umaagaw

Hindi man magiging madali ang paraan

Ngunit mundo natin ay muling magtatagpo

Kung parehas talaga an gating pananaw

Pero mukhang hindi na natin maipipilit pa

Dahil ang salitang katapusan ay natatanaw ko na

At bago pa tuluyang matapos itong aking tula,

Mabuti pa siguro ay tanggapin ko nga

Tanggapin na hindi ko na maibabalik pa

Tanggapin na baling araw ay may darating pa

Tatanggapin ko na na maroon talagang mga bagay na nawawala

At tanggapin na ang unan na katulad mo ay dapat pinapalitan talaga